“última cea” de condenados a morte en Vigo

Amnistía organiza mañá unha “última cea” de condenados a morte en Vigo e recolle sinaturas para parar a execución do español Pablo Ibar en Florida

A Estrada súmase á Xornada Mundial “Cidades pola Vida” con outras nove localidades de España e na Coruña unha pancarta colgará desde o venres na Casa-Museo Casares Quiroga

Vigo.- Co gallo da celebración da Xornada Mundial “Cidades pola Vida”, mañá xoves 27 entre as 19.30 e as 20.30, activistas de Amnistía Internacional estarán ao principio da rúa do Príncipe en Vigo para mostrar o seu rexeitamento frontal á pena de morte. Escenificarán unha “última cea” de condenados a morte, repartirán folletos con mensaxes impactantes á cidadanía e pratos con comida representando a última cea dos condenados a matar, ademais de ler un manifesto contra a pena capital.

Tamén invitarán aos viandantes a estampar a súa firma en mensaxes ao gobernador de
Florida (EE.UU.) para que suspenda as execucións. Igualmente, recollerán
sinaturas para o presidente do goberno español a fin de conseguir que
España prohiba a pena de morte nunha futura modificación da constitución
española de 1978, do mesmo xeito que máis de 40 países de todo o
mundo.
A Estrada será o único concello galego que participará na iluminación

de concellos e edificios representativos de dez cidades españolas.
En A Coruña unha pancarta contra a pena capital colgará desde o venres
da fachada da Casa-Museo Casares Quiroga. As xestións con outros concellos
galegos, incluído o de Vigo, non deron o froito esperado por AI.

Esta actividade desenvólvese logo dunha nova resolución de Nacións
Unidas a favor da moratoria mundial contra a pena de morte. Recientemente
aprobouse na Terceira Comisión da Asemblea Xeral da ONU e a mediados
de decembro votarase no Plenario. En total 105 países votaron a favor
da resolución, 48 fixérono en contra e 31 abstivéronse (fronte aos
104, 54 e 29 do ano pasado) o que confirma unha tendencia positiva cara
á abolición da pena capital. A resolución insta aos Estados onde
seguen impoñéndose condenas de morte a que suspendan as execucións,
respecten as normas internacionais sobre a protección dos dereitos
humanos das persoas condenadas, restrinxan progresivamente o uso da
pena capital e reduzan o número de delitos punibles con este castigo.

Máis de 40 grupos de activistas de Amnistía Internacional en distintas
cidades de España participaron en actividades públicas contra a pena
capital desde o 10 de outubro, Día Mundial contra a pena de morte,
ata agora. Estas actividades incluíron conferencias, actos de rúa
e recollida de sinaturas para apoiar ao cidadán español Pablo Ibar,
condenado a morte en Florida, Estados Unidos. Máis de 130.000 persoas
asinaron unha ciberacción en www.actuaconamnistia.org para pedirlle
ao Gobernador de Florida a suspensión deste castigo cruel, inhumano
e degradante no seu estado.

Amnistía Internacional convoca aos medios de comunicación e á cidadanía
para participar nos actos de rexeitamento á pena de morte:

A Xornada Mundial “Cidades pola vida” é unha iniciativa internacional emprendida pola organización italiana “Comunidade de Sant’Egidio,” co apoio da Coalición Mundial
contra a Pena de morte, á que pertence Amnistía Internacional, así
como outras 62 organizacións, colexios de avogados, sindicatos e autoridades
locais e rexionais.

O 30 de novembro celébrase o aniversario da primeira abolición da
pena de morte nun estado, que levou a cabo o Gran Ducado de Toscana
en 1786. A Xornada Mundial “Cidades pola Vida – Cidades contra a
Pena de morte” convócase desde 2002 para impulsar a abolición da
pena capital en todo o mundo, e Amnistía Internacional colabora activamente
desde 2003.

Amnistía Internacional oponse á pena de morte en todos os casos porque considera que é irrevocable e existe sempre a posibilidade de executar a unha persoa inocente en
calquera país onde se impoña. A pena de morte é arbitraria e discrimina
a quen son pobres, sofren marginación ou pertencen a unha minoría.

Ata hoxe, 137 países aboliron a pena de morte na súa lexislación
ou na práctica. Durante 2007, polo menos 1.252 persoas foron executadas
en 24 países; e polo menos 3.347 persoas foron condenadas a matar en
51 países.

Amnistía Internacional Galicia -
Equipo de Medios de Comunicación
Alberto Estévez
www.es.amnesty.org