Concerto solidario con Rumbo a Gaza en Santiago de Compostela: Será na Sala Nasa, o próximo 4 de Maio, às 21:30. Ali estarán Quempallou, The Homens, García MC. A “ordem e o progresso” correrán por conta de Carlos Blanco. O billete é de 5€ e os benefícios serán para a II Flotilla da Liberdade, que en breve zarpará Rumbo a Gaza. Con 15 buques e centos de cooperantes de mais de 50 países, Galiza entre eles. Con axuda para a castigada populación da Faixa. Coa intención de furar o bloqueo, cruel e ilegal, a que a ten submetida Israel.
Argumentos: Fuente (Alfredo Iglesias Diéguez, Esculca)
A Faixa de Gaza é un territorio de 360 Km2 onde actualmente viven millón e medio de palestinas e palestinos que, dende o 12 de xuño de 2007, sofre un brutal e obsceno bloqueo -imposto pola que se chama 'única democracia de Oriente Próximo', tras o triunfo electoral de Hamas nese territorio-, que ten consecuencias lamentables sobre a vida do pobo palestino ao desabastecelo de alimentos, material sanitario, combustible.... Porén, este bloqueo non é un feito illado: ao bloqueo cómpre engadir, ademais, a expropiación de recursos naturais tan vitais como a auga, a destrución de árbores e campos e a destrución de casas e outras infraestuturas vitais (escolas, universidades, centrais eléctricas, estradas...), feitos lamentables que están a provocar que o 80% da poboación palestina viva por debaixo do límite da pobreza con menos de 2,10$ diarios, que a taxa de desemprego entre a poboación activa palestina sexa do 50% e que o futuro do pobo palestino estea severamente ameazado, como se desprende de diferentes informes elaborados nos últimos anos.
Precisamente para romper ese bloqueo, no ano 2009 formouse a coalición internacional da Freedom Flotilla, que se rexe por un decálogo que se basea nos seguintes principios: o respecto dos dereitos humanos, sen distinción de raza, xénero, relixión, orientación sexual, idioma... e a adhesión aos principios da non violencia; o cumprimento das resolucións das Nacións Unidas e do dereito internacional; os territorios ocupados por Israel dende o 5 de xuño de 1967 deben ser devoltos aos seus lexítmos habitantes, polo que o Estado de Israel ten que por fin ao bloqueo e ao control a que están sometidos, retirar o exército de ocupación, derribar todas as barreiras construídas para restrinxir a circulación da poboación e revogar todas as leis israelís que limitan a liberdade de acción da poboación palestina neses territorios; o Estado de Israel debe recoñecer os dereitos fundamentais ás cidadás árabe-palestinas e aos cidadáns árabe-palestinos de Israel; o recoñecemento do dereito a todas as refuxiadas e a todos os refuxiados ao retorno do exilio, tanto para si comopara os seus descendentes, así como o dereito a recuperar as súas propiedades e a obter unha indemnización polo uso indebido dos seus bens, que de conformidade co dereito internacional non pode ser negocible individualmente, senón que é un dereito colectivo de aplicación individual. Así mesmo, a Coalición, en tanto que solidaria co pobo palestino, non apoia a ningún partido político nin a ningunha organización concreta.
Mais Info: www.bds-galiza.org
Cartaz en PDF: www.esculca.net/pdf/flotilha.pdf
No hay comentarios:
Publicar un comentario